Lasanble i fini depouy bidze tou bann antite ki tonb anba portfey Vis-Prezidan |16 November 2019
Bidze pour Lotorite Endistriel Providence (IEA) (en sonm R12.188 milyon), bidze pour Departman Zafer Etranzer (en sonm R15.662 milyon), i parmi bann antite ki tonb anba portfey Vis-Prezidan ki Lasanble ti fini depouye e aprouve yer me dan pour Departman Zafer Etranzer, en sonm R1.914 milyon ki ti pour al dan depans pour ouver en lanbasad Moris, sa in ganny sispann ziska ki tou bann parti konsernen i ariv lo en konsansis. Sa desizyon in pran apre ki ti annan en miting yer apremidi avek komite zafer etranzer Lasanble, reprezantan Minister Finans pourÌýÌý diskit sa size apre ki deba lo bidze sa departman ti retarde Zedi.
Konsernan bide pour DICT, Vis-Prezidan ti rankontre bann staf sa departman yer pour reasir zot antretan ki diskisyon i kontinyen ant bann parti konsernen pour vwar meyer fason pour bouz devan lo sa size.
Bidze pour IEA ti premye parmi bann antite ki ti ganny depouye yer bomaten.
Sete son sef egzekitif, Manmzel Lucy Athanasius, ansanm avek Vis-Prezidan Vincent Meriton limenm ki ti reponn kestyon konsernan bann diferan lenfrastriktir ki sa lotorite i annan manda pour met anplas dan bann zòn endistriel parey Providence, lo Zil Eve Praslin osi byen ki devlop bann teren oubyen fer bann pti proze lenfrastriktir dan bann distrik pour devlopman pti e mwayen antrepriz pour permet sa bann biznes devlope.
Parmi bann kestyon pertinan ki ti leve konsernan rol IEA, ti konsern proze devlopman lo Zil Eve lo Praslin ki ziska aprezan pa ankor materialize. Kestyon ti ganny demande par manm elekte pour Baie Ste Anne Praslin Msye Churchill Gill.
Manmzel Athanasius ti fer resorti ki proze lenfrastriktir Zil Eve in fini aprouve e tender ti lanse an Zilyet pour ki travay lo premye faz ti ekspekte konmanse an Septanm pour fini an Desanm 2020 me akoz in annan en appeal lo desizyon tender, sa proze pa’n konmanse akoz IEA i ankor pe esper rezilta sa appeal sorti kot Tender Board.
Konsernan en proze park maren e endistriel lo Zòn 20 Providence, la ankorÌýÌý Manmzel Athanasius ti eksplik Lasanble bann diferan konstrent finansyel ki’n fer ki sa enn proze osi in ganny retar e son tender ki ti’n ekspekte lanse an Septanm sa lannen pa’n ganny fer e plan pour sa lenfrastriktir i ankor kot Lotorite Plan. Manmzel Athanasius in osi donn detay lo lezot proze devlopman ki pe deroule lo Zòn 20 ki enkli en lot semen pour trafik sorti dan Providence e in dir ki kou total pour sa bann lenfrastriktir i ekspekte tonm anviron R49 milyon enkli sa semen ki ekspekte konplete par Desanm 2020 me in fer kler ki aktyelman IEA napa finansman pour konplet sa proze.
Bann manm ti annan bokou kestyon konsernan kapasite IEA pour kapab met anplas sa bann lenfrastriktir pour permet bann biznes ki pe esper en landrwa gannyen pour zot kapab bouze e devlope, finansman ki IEA i gannyen pour fer sa ki zot dir pa ase, defi pour fer alokasyon later dan bann zòn endistriel, nesesite pour revwar rol IEA e donn li son lotonomi pour kapab fonksyonn lo limenm e rod son prop finansman… parmi plizyer lezot pwen ankor.
Lo son kote Manmzel Athanasius ti fer resorti plizyer defi ki IEA pe fer fas avek.
Lo son kote dirizan lopozisyon Wavel Ramkalawan ti felisit IEA pour zefor ki in fer pour met lord dan son bann rikord e pour ranmas plis reveni me kantmenm sa in dir ki i ankor annan en kantite travay pour sa lotorite fer pour asire ki bann pti e mwayen biznes i ganny en landrwa pour zot osi devlope e la in fer plizyer propozisyon ki IEA i kapab swiv pour li kapab ed pa zis bann gro biznes me bann ki pti osi.
Lo son kote Vis-Prezidan Meriton in met lanfaz lo nesesite pour travay avek IEA pour devlop son kapasite finansyel pour fer li zener son prop larzan antretan ki demars i kontinyen pour li vin otononm.ÌýÌý
Tar yer apremidi sef egzekitif Departman Lendistri ek Devlopman Lantreprenarya, Manmzel Angelique Antat, ti vin defann son bidze R4.490 milyon pour lannen prosenn ki ti osi ganny aprouve.
Antretan en bidze R9.342 milyon pour NISTI, R24.441 milyon pour Biro Standar Sesel, R3.764 milyon pour Komisyon Lenformasyon ti ganny aprouve san okenn deba.
Lendi letan Lasanble i repran son deba lo bann diferan alokasyon bidze i pou depouy bidze Zidisyer, Lezislativ, Komisyon Medya, SBC ek Komisyon Anti- Koripsyon.
Ìý
Marie-Anne Lepathy