Lasanble i kestyonn pratik kot madanm ki ansent pandan probasyon dan lapolis i ganny fer aret travay |01 October 2019
Depi 2015 ziska 2019, 8 zofisye madanm ki lo ran trainee constable lo probasyon in ganny fer aret travay akoz lansentman e ladan 5 in retournen pour kontiny zot formasyon e zot pe travay .
鈥淧eryod probasyon i sa letan kot sa dimoun i fer bann lantrennman fizik enkli dril, kot i aprann servi bann lekipman, lezot prosedir e pratik dan Lapolis parey ki mannyer pour fer bann arestasyon. I osi enportan note ki lafors Lapolis in toultan fer sir ki ler bann trainees dan sa sitiasyon i ganny desarze, zot ganny peye tou zot merit e zot osi ganny sa loportinite pour zot retournen sis mwan apre ki zot in fini delivre zot baba,鈥� Minis responsab pour Zafer Entern, Madanm Macsuzy Mondon, ti dir Lasanble dan en sesyon semenn pase.
Minis Mondon ti donn sa bann detay letan i ti pe reponn en kestyon par manm elekte pour Roche Caiman, Audrey Vidot, ki ti anvi konnen ki kantite zofisye madanm ki鈥檔 ganny fer arete dan lafors Lapolis dan sa dernyen 5-an akoz zot lansentman e anba ki lalwa ki lafors Lapolis i servi pour termin lanplwa en zofisye madanm lo baz son lansentman.
Minis Mondon in dir ki lafors Lapolis i annan aktyelman 446 zofisye madanm avek diferan ran depi konstab ziska sirentandan.
Minis in eksplike ki lafors Lapolis i ganny gide par Police Force Act e parey tou lorganizasyon lafors Lapolis Sesel i annan son bann polisi administrativ, polisi zestyon resours imen, osi byen ki son polisi operasyonnel.
Minis Mondon ti eksplike ki letan en dimoun i zwenn lafors Lapolis konman en zofisye, i antre lo en peryod probasyon 1-an e sa i spesifye klerman dan Seksyon 62 Police Force Regulation -- 5,1 ek 2. Pandan ki en zofisye i lo probasyon, i annan bann kriter performans ki i bezwen zwenn pour li kapab ganny konfirmen dan son pos e dan ka bann zofisye madanm zot ganny averti pour pa tonb ansent pandan ki zot lo probasyon. Me si sa i arive Minis Mondon i dir ki dan lartik 18 (1a) i fer provizyon pour Komisyonner desarz en trainee constable si i pa zwenn kriter performans e i pa pou kapab desarz son rol ek responsabilite konman en zofisye lapolis.
Onorab Vidot ti anvi konnen si sa i pa en diskriminasyon kont bann madanm san pran kont zot drwa anba Lartik 30 nou Konstitisyon kot i mansyonn drwa travay bann madanm lefe ki Minis Mondon in dir ki sa i en polisi pour desarz sa bann madanm dan sa sitiasyon.
Minis Mondon ti eksplike ki si okenn zofisye madanm i santi ki sa i en diskriminasyon kont li oubyen son drwa konstitisyonnel pe ganny vyole, i toultan kapab al rod rekour legal devan Lakour Konstitisyonnel.
Ti annan bokou kestyon lo sa size e manm LDS, Terence Mondon, ti demande si sa polisi pa al kont tou bann trete/konvansyon rezyonnal e enternasyonal lo drwa imen e diskriminasyon kont bann madanm e akoz ki dan sa bann ka Lapolis pa redeplway sa bann madanm dan en lot departman ziska ki zot fini ganny zot baba.
Minis Mondon ti fer resorti ki lapolis i en lafors disipliner e sa polisi i aplik selman pour bann trainee constables ki lo probasyon e dan letan kot zot pe fer tou zot bann formasyon e zot ganny eksplike klerman tousala depi lo konmansman. Me sa ki pli enportan i ki apre ki zot in delivre zot baba zot kapab retournen me sa lalwa pa aplik pour lezot zofisye madanm ki鈥檔 deza konplet zot formasyon e in fini entegre dan lafors Lapolis.
Minis Mondon ti fer kler ki si en madanm i deside antre dan lafors Lapolis, ki en lafors disipliner, i bezwen swiv bann regilasyon anplas.
Ti annan pliyer lezot kestyon ki ti swiv parey si en madanm dan sa sitiasyon i en bon kandida pour ganny rekrite dan en lot lanplwa, si lansentman i en maladi, en andikap, si en zofisye zonm ki osi lo probasyon ki responsab pour sa lansentman li osi i ganny desarze?
Minis Mondon ti fer resorti ki en madanm ki ansent pa ganny rekrite dan lafors an premye lye akoz zot fer tes medikal pour konfirm sa e i ti osi dir ki Lapolis pa pe fer sa pour pini bann madanm me plito pe protez zot dan en sans pour pa perdi zot baba e sa bann konparezon pa tenir.
Ti osi annan en manm ki ti sizere ki sa polisi i ganny detaye kler e sinyen par tou bann madanm ki antre dan lafors Lapolis.
Lo son kote dirizan lopozisyon Wavel Ramkalwan in lans lapel avek tou bann zenn fiy e zenn madanm ki fek zwenn lafors Lapolis pour mazin byen zot lavenir.
鈥淢azin zot karyer avan fer zanfan parski se zot karyer ki pou fer zot kapab nouri en zanfan. Alor premyerman fer zot training, pa tonb ansent, pran zot responsabilite e apre zot a fer zot zanfan,鈥� Msye Ramkalawan in dir.
Minis Mondon in osi konfirmen ki kontrerman avek sa ki pe ganny dir, si en madanm in fini son probasyon e konfirmen dan son pos i pa pou kapab ganny pouse si i ansent. Si i鈥檔 ganny pouse i pour en lot rezon me pa akoz lansentman.
听